كيفيه التعامل مع الحروق

بالفصحى و بالعامّيه .. عن الحروق و إسعافاتها الأوليّة

تخيل معايا الموقف ده😊

انت وصاحبك الانتيخ قاعدين بتتفرجوا ع الماتش مع كوبايتين الشاي الجامدين دول ☕️☕️
بعد شويه لقيت هوباااااااا و هالله هالله هالله جه جون
و قمت انت قايم بكل رشاقة و خفة و دلع خابط كوبايه الشاي المولعة دالقها علي إيده

إيه هايكون تصرفك وقتها ؟🤔

بتقول ايه ؟! 😱
انا مش مصدق وداني

بتقول أومّال معجون السنان اتعمل ليه!!

ثانية واحده كده ✋🏻
فيه مداخلة أُنثَويّة بتقول ايه الكلام ده
هو ايه اللي معجون سنان ده

روحي يا شيخه إلهي يباركلك
اتفضلي قوليله 😊

بِسْم الله الرحمن الرحيم
احنا هانجيب زبده او بيض او دقيق او .....

باااااااااااااااااااااااااس ✋🏻✋🏻✋🏻
انتي لسة هاتكملي بعد اللي انتي قولتيه ده 😳

دي وصفة الكيكة الإسفنجية دي مش طريقه إسعاف الحروق 😂😂😂

بص ياريس يا بتاع معجون السنان
معجون السنان إسمه معجوووووون سناااااان
واللي انت ماتعرفهوش انه بيُستخدم للسنان😉

و بالنسبة لوصفات الآنسه
هي فعلاً الحاجات دي بيتم استخدامها كتييييييير جداً
بس في الأكل مش في إسعاف الحروق 🙄

طيب نُخُشّ بقا ف المفيد

أولاً : ممنوع استخدام أياً من الوصفات السابقة دي

ثانياً : 🚰🚰ماء جاري من الحنفية مدة لا تقل عن ١٠ دقايق
والمتوسط ٢٠ دقيقة

ثالثاً : لا يتم تغطية المكان المتعرض للحرق بقطن نهائياً
و يفضّل عدم تغطيته اصلا
ولو حتماً ولا بد يعني انك تغطية ساعتها بيتغطّى بشاش فازلين ( من أي صيدلية)

و بكرّر احنا بنتكلم عن حروق ( الدرجة_الأولي) اللي بينتج عنها احمرار في الجلد
او أي ألوان تانيه بس المهم ان الجلد موجود يعني

رابعاً : لا يتم استخدام كمادات ثلج بوضع الثلج مباشرةً
و إنما يوضع الثلج في قطعة قماش او في أكثر من كيس داخل إحداها الآخر
و ذلك لإن الثلج في حد ذاته قد يُنتج حرق من شدّة برودته

خامساً : لو حصل ان كان الموضوع أكبر من كده شويه و حصل بقاليل ف الجلد ( ده معناه اننا دخلنا في حروق الدرجه التانيه)

لا يتم فرقعة البقاااااااليل

باجماعة كل واحد يخلي باله من بقاليله 😂

البقاليل دي بيبقي جواها سوائل مهمه جداً لالتئام الحروق بدون أن تترك أثر
كما إن فرقعة هذه البقاليل بيسبب جرح قد ينتج عنه تلوث
فابالاااااااااااش نفرقع فيها تاني وبالااااااااااااااش نخرّم فيها تاني
و بالاااااااااااااش
نفتّح فيها تاني و بالااااااااااش

سوري يا جماعة اندمجت شوية 😂😂

آخر حاجة بقي

لو لا قدر الله فيه ملابس اتحرقت و لزقت ف الجلد
ممنوع إننا نشدها بالقوة
ولا حتي باللين
ولا نشدها خالص ✋🏻
طب نعمل ايه
نسيبها
اه نسيبها و نقص من حوالين الجزء اللي لازق
ونروح أقرب مستشفى🚑 و الطبيب المختص هو اللي هايعمل اللازم
وساعتها صدقني هايسأل مين اللي ساب القماش لازق و ماشدهوش و هايشكرك جداً
اه والله
لان هايعرف انك فاهم
بس ساعتها إبقى قول له ان انا اللي قولتلك 😜

مهم جداً وانت بتساعد اي مصاب انك
أولاً ☝🏻 : تحمي نفسك
ثانياً ✌🏻: ماتزودش معاناة المريض او المصاب

بس خلاص 😊